لېکنه: شکېبا نادري، د نړۍ اووه حیرانونکي ځایونه
دریمه برخه
تاج محل
تاج محل د اګرې ښار ته نږدې د ډهلي د سویل خوا یعنې د هندوستان د پلازمېنې په 200 کیلو میټرۍ کې موقعیت لري. تاج محل د مغلو د واکمنۍ هغه نه هېرېدونکې ډالۍ ده، چې د نړۍ په اوو حیرانونکو ځایونو کې شمېرل کېږي.
د تاج محلل تاریخچه
ممتاز محل چې ایرانیان ورته ارجمند بانو وایي د شاه جهان درېیمه مېرمن وه، شاه جهان له ممتاز محل سره ډېره مینه درلودله، ان تر دې چې ځینې وخت به یې جګړو ته هم له ځان سره بېوله، به دې جنګ کې چې په 1631 کال کې ممتاز محل چې د څلورلسم ځل لپاره اومیندواره هم وه ووژل شوه.
د تاج محل د جوړېدو کار یو کال وروسته د ممتاز محل له مرګ څخه یعنې په 1632 کال کې د شاه جهان په امر پیل شو او کار یې په 1653 کال کې پای ته ورسېد چې کابو پینځلس کاله وخت یې ونیوه، شاه جهان د دې لپاره چې تل یې خپله مېرمنه په یاد و اوسي دا ځای جوړ کړ.
د تاج محل لګښت
شاه جهان د تاج محل د جوړولو مسوولیت احمد لاهوري ته ورکړی و احمد لاهوري د دې ځای د ښه جوړښت لپاره 20000 کارکوونکي، لکه معماران، نقاشان، لیکوالان، د ډبرو تراش کوونکي او داسې نور په کار وګمارل او دا کار کوونکې یې له بېلابېلو هېوادونو، لکه ایران، هند او مرکزي اسیا څخه را وغوښتل. د تاج محل د جوړولو پر مهال یې د ډبرو او نورو شیانو د وړلو لپاره له پیلانو څخه ګټه اخیستله. د تاج محل په جوړولو کې یې د مرمر او لاجوردو له تیږو څخه ډېره ګټه اخیستې ده، د دې په جوړولو کې له 28 ډوله قیمتي او نیمه قیمتي ډبرو څخه کار اخیستل شوی دی، دا ډبرې ډېری له افغانستان، ایران، راجستان، چین او تبت څخه راوړل شوې دي، د تاج محل د جوړښت ټول لګښت یومیلیارډ ډالرو ته رسېږي، د دې تر څنګ د تاج محل په شاوخوا دېوالونو په ډېر ښه لیک سره ښکلي شعرونه، ایتونه او د خدای ﷻ نهه نوي نومونه لیکل شوي دي، تاج محل ډېر د اسلامي ځایونو په بڼه جوړ شوی دی، تاج محل د مینې، سپېڅلتیا او درد سمبول دی.
د تاج محل په جوړولو کې د مرمر له ډبرو څخه ګټه اخیستل د دې لامل شوي دي چې تاج محل د ورځې په اوږدو کې بېلابېل رنګونه غوره کړي، لکه په سهار کې یې رنګ ژېړ، په ماسپښین کې سپین او په ماښام طلایي وي. شاه جهان هم له مرګ څخه وروسته په همدې ځای کې خاورو ته سپارل شوی دی. داسې هم ویل شوي دي چې شاه جهان د تاج محل له بشپړېدو وروسته د ټولو کارکوونکو لاسونه پرې کړل، تر څو بل داسې ځای جوړ نه شي کړای.
نور بیا...
