لیکنه: شکېبا نادري، د پرله پسې ماتو خوړلو لاملونه
د ټولو انسانانو په ژوند کې ستونزې شته دي، هېڅ داسې انسان د ځمکې پر مخ نه شته چې ستونزې و نه لري. یوازې توپیر یې دا دی چې د ځینو کسانو ستونزې لږ او د ځینو بیا ډېرې وي، خو تر ټولو بریالي کسان هغه دي چې له ټولو ستونزو سره وجنګیږي او وروسته له هرې ماتې هڅه وکړي چې بیا پر خپلو پښو ودرېږي، یو نوی ژوند پیل کړي او د یوه پرمختللي راتلونکي دروازه ځان ته پرانیزي.
موږ په نننۍ لیکنې کې تاسو ته د ماتې خوړلو لاملونه روښانه کوو او د حللارو لپاره یې درته لارښونه کوو، که تاسو هم غواړئ چې په ژوند کې مو د ماتې خوړلو په لاملونو پوه شئ او ځانونه ترې لرې کړئ، نو زموږ دا لیکنه تر پایه ولولئ!
۱. له خوشحاله خلکو سره ځان پرتله کول
د ماتې د خوړلو یو لامل دا دی چې موږ تل ځان له هغو کسانو سره پرتله کوو، چې خوشحاله ژوند لري، هر انسان په ژوند کې ستونزې لري ځینې کسان د خپلو ستونزو په اړه نورو ته څه نه وایي او موږ فکر کوو چې هغوی ډېر خوشحاله ژوند لري، زموږ دا پرتله زموږ د بریا مخنیوی کوي او ماتې ته مو نږدې کوي.
۲. د نورو په خوښه پرېکړه کول
هر انسان د خپل شخصي ژوند د هر اړخیزو پرېکړو حق لري، هغه کسان چې د خپل ژوند پرېکړې د نورو خلکو په خوښه کوي، ډېر ژر به له ماتې سره مخ او له بریا څخه به لرې شي.
۳. د تېرو تېروتنو لپاره پښېماني
هېڅ داسې انسان نه شته چې تېروتنه ونه کړي، که یو کس هر څومره هڅه وکړي چې له تېروتنو ځان وژغوري، خو ارومرو داسې یوه تېروتنه ترې کېږي چې نه غواړي هغه تېروتنه تر سره کړي.
د بریالیو کسانو یوه ځانګړنه دا ده چې د تېر مهال لپاره پښېماني نه کوي او خپله ټوله هڅه د راتلونکي لپاره کوي، چې هغه تېروتنه بیا تکرار نه کړي، خو د تېر مهال لپاره پښېماني مو د بیا ماتې خوړلو لامل کېږي او د بریا مخه مو نیسي.
۴. په زړه کې کینه ساتي
هغه کسان چې په زړه کې کینه ساتي پرله پسې ماتې خوري او نه شي کولای پرمختګ وکړي، ځکه دوی تل د ټولو خلکو په کوچنیو خبرو په زړه کې کینه کې ساتي، دا کینه د دې لامل کېږي چې دوی د مثبت فکر پر ځای منفي فکر وکړي او له بریا څخه ځان لرې کړي.
۵. په ژوند کې نوښت نه راولي
هغه کسان چې یو ډول ژوند لري او هڅه نه کوي چې په ژوند کې بدلون راولي، ژوند ورته یو ستړی کوونکی مزل ښکاري، نو داسې کسان تل له ماتې سره مخ کېږي او ورځ تر بلې له پرمختګ او بریا څخه لرې کېږي.
که غواړئ چې یو بریالی او هوسا ژوند ولرئ، نو هڅه وکړئ چې د ځان لپاره ژوند وکړئ، نه د خلکو لپاره، که موږ په دې فکر و اوسو چې که زه دا کړنه تر سره کړم نو خلک به څه وایي، دا فکر د دې لامل کېږي چې موږ له بریا لرې او ماتې ته نږدې شو.
