کټرینا کیف وپېژنئ!
3,316
Riaz Muqamzai - ریاض مقامزی
2021-11-30 04:13:47
ژباړه ـ ریاض مقامزی
په دې ورځو کې د فلم له نړۍ څخه تود خبر دا دی، چې راتلونکي میاشت نوموتې اداکاره "کټرینا کیف" واده کوي. د سینما د ډګر ددې نوموتې اداکارې د واده خبر په چټکۍ سره خپرېږي او د راپورونو له مخې سر له اوسه خورا ډېر هوټلونه ددې واده لپاره کرایه شوي دي. په هر حال؛ شاید تاسو ته به هم د نوموړې په اړه ډېرې پوښتنې پیدا شوې وي. موږ هڅه کړې، چې په اړه یې مهم معلومات له تاسو سره شریک کړو.
کټرینا کیف څوک ده؟
د بالیووډ ددې مشهورې ممثلې بشپړ نوم کټرینا کیف "Katrina Kaif" دی. د نوموړې پلار "محمد" نومېږي، چې اصلا د کشمیر اوسېدونکی دی او مور یې بیا "سوزانا تورګوت" نومېږي، چې د انګلستان اوسېدونکې ده. پخپله کټرینا بیا د همدې جوړې له ګډ ژوند څخه په هانګ کانګ هېواد کې زېږېدلې ده. د زېږېدو نېټه یې د "۱۹۸۴ز" کال د جولای شپاړلسمه ده. نوموړې د خپلې کورنۍ پنځم اولاد ده، چې یو ورور او شپږ نورې خویندې لري.
کله چې مور او پلار یې سره جلا شول کټرینا له خپلې مور سره یو ځای چین او جاپان ته مهاجرت وکړ. په اته کلنۍ کې فرانسې ته لاړه او له هغه ځايه وروسته یې په ځینو نورو هېوادونو کې هم د لنډې مودې لپاره ژوند وکړ، تر دې چې بالاخره په انګلستان کې میشت شوه. جالبه دا چې نوموړې د انګلستان تابعیت لري؛ خو کار په هندي فلمونو کې کوي. نو له همدې امله هغه اړ ده، تر څو په هند کې د کار ویزې په درلودلو سره ژوند وکړي.
له موډلېنګ تر اداکارۍ
لکه د نورو ممثلینو کټرینا هم راسا د سینما نړۍ ته نه ده راغلې. نوموړې په "۱۹۹۸ز" کال کې ـ کله چې "۱۴" کلنه وه ـ د تبیلغاتي موډلې په توګه دنده پیل کړه؛ تر دې چې له څو کاله کار کولو وروسته د انګلستان میشتي، هندي فلم جوړونکي "کایزاد گوستاد" پام ور واښت. نوموړي کټرینا د اداکارۍ لپاره انتخاب کړه او په دې توګه موډله کټرینا پر ممثلې کټرینا بدله شوه او په یوه نوې نړۍ کې یې د بریا ګامونه پورته کړل. لومړی فلم یې په "۲۰۰۳ز" او دویم یې بیا په "۲۰۰۵ز" کال کې خپور شو، چې ډېر ژر یې د مینه والو زړونه خپل کړل او هم یې د فلمي متخصصینو رضایت خپل کړ. تر دې، چې تر اوسه یې په دې برخه کې ګڼې جایزې هم ترلاسه کړي دي.
له چا سره واده کوي؟
که څه هم کټرینا د لومړي ځل لپاره د هندي فلمونو له بل نوموتي اداکار "سلمان خان" سره ګډ ژوند درلود؛ خو له څه مودې ګډ ژوند وروسته سره بېل شول. اوس ـ اوس یې د بالیووډ یو بل تکړه ممثل "ویکي کوشال" د خپل ژوند د ملګري په توګه ټاکلی دی. د راپورونو له مخې ددې جوړې د واده مراسم به د راتلونکې ډیسمبر میاشتې په ۷-۸ نېټه پیل شي او درې ورځې به دوام کوي. د ځای په اړه یې ویل شوي، چې د واده دا مراسم به د هند په راجستان ایالت کې ترسره کېږي.
