ژباړه ـ ریاض مقامزی
په دې وروستیو کې د کرونا ضد واکسینونو په اړه بېلابېلې اوازې خپروې شوي دي، چې ډېری یې په جنسي اړیکو پورې اړه لري. یو له دې اوازو څخه دا ده، چې ویل کېږي د کرونا ضد واکسین د نارینه وو سپرم کمزوري کوي او دوی له شنډوالي سره مخ کوي.
که په ساده ټکو یې ووایو، نو ادعا شوې ده، چې که څوک د کرونا ضد واکسین وکړي نو اولادونه به یې نه کېږي؛ خو دا چې دا اوازه څومره رښتيا ده او وروستۍ څېړنې کومې پایلې لري، په دې لیکنه کې یې لوستلای شئ.
آیا د کرونا ضد واکسین رښتیا هم د نارینه وو جنسي وړتيا کمزورې کوي؟
که څه هم لا له وړاندې څو څېړنو دا ثابته کړې ده، چې د "کوویډ ۱۹" ضد واکسینونه هېڅکله نارینه نه شنډوي او د نارینه وو سپرمونه نه کمزوري کوي؛ خو د نوو څېړنو پایلې لا ښه او حيرانوونکي دي.
امریکايي څېړونکو په دې اړه تازه پلټنې کړي دي او د نارینه وو سپرمونه یې د mRNA په مرسته د کرونا واکسین له تزریق وړاندې او وروسته کتلي دي. ترلاسه شوو پایلو ښودلې ده، چې د اوازو برعکس د کرونا ضد واکسین د نارینه وو سپرمونه لا پیاوړې کوي او کیفیت یې لوړوي.
په دې څېړنه کې چې د میامي پوهنتون څېړونکو لخوا ترسره شوې، پایلې یې د طبي تخصص په مجله (جاما نيټورک ـ Jama Network) کې خپرې شوې دي. په دې تحقیق کې د "۴۵" تنه هغه نارینه وو د سپرمونو نمونې څېړل شوي دي، چې عمرونه یې د "۱۸" او "۵۰" کلونو ترمنځ وو. دې کسانو د بایونټيک/فایزر او یا مدرنا واکسینونه ترلاسه کړي وو. همدارنګه د سپرم نمونې یې د کرونا واکسین له ترلاسه کولو ۷ یا ۸ ورځې وړاندې او ۷۰ ورځې وروسته له واکسین څخه اخیستل شوي او څېړل شوي دي.
پرته له اتو تنو د نورو د سپرمونو په کیفیت کې هېڅ ډول توپیر نه و راغلی؛ مګر د اتو تنو په سپرمونو کې د اوازو برعکس لا ښه والی لیدل شوی او کیفیت یې تر پخوا څو چنده لوړ شوی و.
آزاده ژباړه
