مشهور کمیډین چارلي چاپلېن به ویل:
«که بې هدفه لهٔ خوبه راپاڅېدې، ښه دا ده چې بیا ویده شې!»
دا چې اهداف تر لاسه کول دومره مهم دي، نو ولې یې پهٔ تر لاسه کولو کې پاتې راځو؟
د دې لپاره به ساده ځواب دا وي، چې مونږ د اهدافو د تر لاسه کولو لپاره منظم پلان نهٔ لرو.
دلته ځینې هغه لارې- چارې زده کوو، چې د اهدافو د ټاکلو او تر لاسه کولو لپاره اړینې دي:
۱- د هغو پایلو پهٔ اړه فکر وکړئ چې تاسې ورته پهٔ تمه یئ.
د هدف لهٔ ټاکلو مخکې اول د هغه څهٔ پهٔ اړه فکر وکړئ چې تاسو یې د تر لاسه کولو هڅه کوئ. لهٔ ځان نه وپوښتئ:
آیا دا هغه څهٔ دي چې زهٔ یې غواړم؟
آیا دا اهداف پهٔ دې ارزي چې وخت او انرژي پرې ضایع شي؟
دا دوه پوښتنې ځوابول درسره دا مرسته کوي، چې مهم، اړین او هغه اهداف معلوم کړئ چې تاسې ته حق اولیت لري.
۲- معیاري اهداف
اهداف باید مشخص، د اندازې وړ، تر لاسه کېدونکي، واقعیت لرونکي او د وخت پابند وي.
مثلاً ډېری کسان د وزن کمولو لپاره اهداف ټاکي، مګر دوی دا نهٔ مشخصوي چې دوی څومره وزن کموي، او دا اهداف پهٔ څومره وخت کې تر لاسه کول غواړي. یو ځانګړی (معیاري) هدف باید داسې وي:
«زهٔ غواړم د نومبر تر لسمې ۱۵ کیلو وزن کم کړم.»
دا هدف تاسې ته د وزن کمولو دقیق مقدار او د هغه د تر سره کولو وخت پهٔ ګوته کوي.
۳- خپل اهداف نوټ کړئ.
کله چې خپل اهداف ولیکئ، دا بیا سړي ته ریښتیني او د حس کېدو وړ ښکاريږي، که یواځې یې پهٔ خپل ذهن کې وساتئ، نو یو ناڅرګند نظر پاتې کېږي.
شخصي اهداف مو پهٔ کمپیوټر، سمارټ فون یا د آئینې په ښیښه پهٔ یو کوچني کاغذ ولیکئ.
د ټیم اهداف مو د کارځای پهٔ مېز، یا مېز ته څېرمه دیوال باندې پهٔ نوټ کړئ.
۴- د عمل پلان جوړ کړئ.
ډېری خلک اهداف ټاکي، مګر هېڅکله یې د تر لاسه کولو لپاره عملاً کار نهٔ پیلوي، تر څو دا مشخصه کړي چې دا اهداف به څنګه تر لاسه کوي؟
د عمل پلان مهم ګام دی، عملاً لاس پهٔ کار شئ، قدم پهٔ قدم مخکې لاړ شئ. کار وکړئ، هدف تر لاسه کړئ.
