لیکنه: شکېبا نادري
یوې ښځې ته هېڅکله دا شپږ جملې مه وایئ!
دا څرګنده خبره ده چې کله یوه نجلۍ واده وکړي، د خاوند په کور کې هغه خپلواکي نه لري، چې د پلار په کور کې یې درلوده، که هغه د جامو له اړخه وي، که د خوراک، که د راحتۍ او بې پروایۍ له اړخه، ځکه کله چې یوه نجلۍ واده وکړي، مسوولیتونه یې ورځ تر بلې زیاتېږي، د خسر، خواښې، خاوند او نورې ټولې کورنۍ کار او مسوولیت باید پر غاړې واخلي، ډېری ښځې د کور د کارونو، د خاوند او خسرګنۍ د مسوولیتونو لپاره له خپل هر څه تېرېږي، لکه تعلیم، دنده او داسې نورو کارونو لپاره هر څه پرېږدي.
موږ په نننۍ لیکنې کې تاسو ته د یو څو هغو جملو یادونه کوو چې هېڅکله یې باید یوې ښځې ته و نه وایئ، ځکه ډېری وخت ښځې د دغو جملو په اورېدو سره ډېرې خپه او ناهیلې کېږي.
که تاسو هم غواړئ، چې په دغې جملو پوه شئ، زموږ لیکنه تر پایه ولولئ!
۱.ته په دومره خپلواکۍ څه کوې؟
ځینې خلک داسې فکر کوي چې خپلواکي بهر ته تلل، د توکو اخیستل او سینګار کول دي، دوی هغو ښځو په اړه چې خاوند یې د بهر تلو، د خپلوانو سره د تګ راتګ اجازه ورکوي، فکر کوي چې دا ښځه د بشپړې خپلواکۍ لرونکې ده، خو کله چې یوې ښځې ته تاسو دا خبره وکړئ، هغه ډېره خپه کېږي، ځکه د هغې په اند خپلواکي دا ده چې درس ووایي، پرمختګ وکړي د ځان، کورنې او هېواد لپاره د خدمت جوګه شي، چې د خاوند له لوري د دغې کړنو اجازه نه ورکول کېږي، نو ستاسو د دې جملې په اورېدو سره ډېره ناهیلې کېږي.
۲. ته به ارومرو ټوله ورځ ویده وې؟
ځینې نجونې او هلکان چې خپله تعلیم کوي، هغوی د کور د ښځو په اړه داسې فکر کوي، چې دوی به هېڅ کار نه لري او دا خبره کوي چې ته به ارومرو ټوله ورځ ویده وې، دا جمله هم د کور پر ښځو ډېره بده اغېزه کوي او ناهیلې کوي یې، نو د دغې جملې له کارولو ډډه وکړئ.
۳. ارومرو د خاوند ښه دنده لري چې ته نه غواړې دنده ولرې
دا خبره بیا هم زموږ له مخکنۍ خبرې سره تړاو لري، یوه ښځه که خاوند یې هر څومره پیسې ولري، خو دا بیا هم غواړي د خپل تعلیم ګټه وویني، خپله لاسته راوړنې او عاید ولري، خو ځینې نارینه خپلو مېرنو ته د دندې اخیستلو اجازه نه ورکوي، نو دوی ستاسو په دې خبره هم خپه کېږي، نو ښه ده چې دا خبره هم ورته ونه کړئ.
۴. ته به دې له اولادونو سره څومره ستړې کېږې
د اولادونو روزنه د هرې مور مسوولیت دی او دا ورته ویاړ ښکاري چې له خپلو اولادونو څخه ښه ساتنه وکړي، نو هېڅکله هم یوې ښځې ته دا خبره مه کوئ چې تاسو به مو له اولادونو سره څومره ستړې کېږئ، ځکه هغوی ستاسو په دې خبرې خپه کېږي.
۵. ته یوازې یوه مور یې
مور هغه پرښته ده چې ځان د خپلو اولادونو لپاره قرباني کوي، خپله ډوډۍ نه خوري، خو خپل اولاد مړوي، کله یې چې اولاد ناروغ وي تر سهار خوب نه کوي او د خپل اولاد تر څنګ ویښه ناسته وي، تر هغه وخته چې ټول اولادونه یې د ډوډۍ خوړلو لپاره رانه شي دا ډوډۍ نه خوري، نو هېڅکله د مور نوم، مقام، او مسوولیت ته سپکاوی مه کوئ، ځکه چې په دې کار سره مو مور ډېره خپه او ناهیلې کېږي.
۶. ته خو بل هېڅ کار نه کوې، خو ولې ستړې ښکاري؟
د پردي کور کارونه او مسوولیت له بل هر کار څخه ستونزمن کار دی، دا مسوولیت هر څوک نه شي تر سره کولای، نو دا خبره هم د ښځو د ناهیلي کېدو لامل کېږي، باید د دغې خبرې له ویلو نه هم ډډه وکړئ.
نو کله مو چې له یوې ښځې سره خبرې کولې که هغه مو مور وه، که خور، که مېرمن او یا مو کوم بل څه وه خپلو خبرو ته مو ډېر پام کوئ، ځکه ستاسو ډېرې کوچنۍ خبرې د دوی د خپګان او ناهیلۍ لامل کېدلای شي.
