لیکنه ـ ریاض مقامزی
موږ او تاسو هغه کسان بریالي بولو، چې خپلو اهدافو ته رسېدلي وي؛ نو په دې معنا چې په ژوند کې خپلو موخو ته رسېدل بریا بلل کېږي. مګر پوښتنه دا ده، چې ولې ځینې خلک بریالي او ځینې نور بیا برعکس ناکامېږي؟ که څه هم ددې پوښتنې ځوابول سخت کار دی؛ خو بیا هم یو څه ښکاره دي. هغه دا چې ځينې ځانګړنې بریالي خلک له ناکامو کسانو بېلوي. راځئ، چې د نړۍ د ځينو کامیابو اشخاصو په اړه ولولو.
مسي د ارجنټاين د فوټبال ملي لوبډلې نامتو لوبغاړی دی. هغه په ۲۰۲۱ز کال کې د غوره فوټبالر په توګه د اووم ځل لپاره هم د سرو زرو توپ وګاټه. په داسې حال کې چې په کوچنیتوب کې ډاکټرانو ورته ویلي و، نوموړی د ودې ستونزه لري او هېڅکله به فوټبال و نه شي کړای.
اډيسن د برق (برېښنا) اختراع کوونکی دی او ټوله نړۍ د هغه له برکته رڼا لري، فابریکې جوړې شوې، صنعت چټک پرمختک وکړ او سلګونه ـ زرګونه نورې ګټې یې انسانانو ته ورسېدې. خو په کوچنیتوب کې یې ښوونکي مور ته ویلي وو، چې نوموړی د زدکړې استعداد نه لري؛ نو پر اډېسن دې کوم بل کار وکړي.
انشټاين د علم او پوهې په برخه کې یو ځلانده نوم دی؛ خو ټولګیوالو به یې تل پرې خندلې او ښوونکو به هم بې عقل ګاڼه.
راشد خان په اوس وخت کې اول د افغانستان او بیا د ټولې نړۍ نامتو کریکټ لوبغاړی دی، چې په دې ډګر کې لسګونه بېلابېل ریکارډونه پخپل نوم ثبت کړي دي. هغه وايي، له کورنۍ څخه به مې پټ کریکټ کاوه او هېچا راباندې باور نه درلود.
د روسیې ولسمشر "ولادیمیر پوتین" چې د نړۍ له ځواکمنو څېرو څخه ګڼل کېږي، د شوروي اتحاد د ړنګېدو په وخت کې یې ټکسي چلوله. همدارنګه میلیاردر "کوین ټروډ" وايي، چې پلار مې غریبکار و؛ خو زه اوس د شپېتو شرکتونو رئيس یم.
دا د بېلګې په توګه ایله د څو بریالیو کسانو د ژوند کیسې وې. په داسې حال کې چې نږدې ټول کامیاب اشخاص د بې وسۍ، کمزورۍ او ناهیلۍ بېلابېل داستانونه لري. له دې بېلګو څخه زموږ موخه دا وه، چې تاسو خپلو وړتیاوو ته متوجه کړو او پر دې مو وپوهوو چې دې ټولو اشخاصو کومې ځانګړنې لرلې، چې له ننګونو سره ـ سره بیا هم بریالي شول؟ ددوی او نورو بریالیو اشخاصو د ژوند داستانونه موږ ته راښيي، چې بریالي اشخاص لاندې ځانګړنې لري.
لومړی| پر ځان باور
که د کامیابو خلکو ژوند مطالعه کړئ، نو دې پایلې ته رسېږئ، چې دوی تل پر ځان باور لري. د "نشم کولای" پر ځای د "کولای شم" نظریه لري او همېشه ثابتوي چې دوی یې کولای شي. په حقیقت کې پر ځان باور دوی ته د بریا ځواک ورکوي. نو که تاسو هم غواړئ تر بریا ورسېږئ نو لومړی پر ځان باور پیدا کړئ.
دویم| خواري
همدارنګه ټول بریالي اشخاص سخته خواري کوي او پښتانه هم وايي، چې بې زحمته راحت نشته. هر څه تقدیر ته مه سپارئ، تدبیر او هڅه هم کوئ. نو د دویمې لارښوونې په توګه به ووایو، چې د خپلو اهدافو لاسته راوړلو لپاره زحمت وباسئ.
درېيم| له کار سره مینه
د بریالیو خلکو د بلې ځانګړنې په توګه ویلای شو، چې دوی تل له خپل کار سره مینه لري او همدا مینه دوی ته پخپل مسلک کې د بریا چانس ورکوي. نو تاسو هم له خپل مسلک او کار سره مینه ولرئ.
څلورم| د نورو خبرې
زموږ او ستاسو اکثریت خلک له دې کبله وروسته پاتي، چې وايي "خلک به څه وايي؟" دا هغه فکر دی، چې تاسو تل له خپلو موخو لرې ساتي. هڅه وکړئ د خلکو خبرې مهمې مه ګڼئ. خپل ځان مطالعه کړئ، استعداد مو درک کړئ او په هماغه برخه کې خپلو خواریو ته دوام ورکړئ. ان شأالله ډېر ژر به د بریا تر آرامې او خوښې څوکي ورسېږئ.
