ليکنه ـ ریاض مقامزی
عطرو ته یې وویل: "ته یو عیب لرې. له هر چا سره چې کېنې خپل ښه بوی ورته ورکوې."
ځواب یې ورکړ: "زه دې ته نه ګورم، چې له چا سره یم؛ بلکې دې ته ګورم چې زه څوک یم."
درسونه
• ومنئ، چې تاسو یوازې د خپلو کړنو مسول یئ. دلته او په بله دنیا کې له تاسو څخه فقط او فقط د خپلو کړنو پوښتنه کېږي.
• دې ته مه ګورئ چې مقابل لوری بېرته له تاسو سره د همکارۍ او مرستې وسه لري که نه. ښه یوازې ددې لپاره وکړئ چې خپل وجدان آرام کړئ او له نېکۍ خوند واخلئ.
• ددې لپاره هېڅکله له چاسره نېکي مه پرېږدئ چې نوموړی بد انسان دی. شاید ستاسو نېکي، مرسته او همکاري پر هغه تاثیر وکړي او يو ښه انسان ترې جوړ شي.
• ستاسو ښه اخلاق، نېکي او ښه خوی کولای شي پر نورو اغېز وکړي او ډېری خلک ستاسو پر پل قدم کېږي.
• لکه څنګه چې باران پر ګل او اغزو یو ډول ورېږي، همداسې تاسو هم پر انسانانو، حېواناتو او نورو موجوداتو مهربانه اوسئ. ستاسو مهرباني د یو بېوسه او بې کسه انسان پر شونډو مسکا را وستلای شي.
• د عطرو په څېر اوسئ. ښه او خوندور. تر څو له ډېر لرې ځایه مو هم خلک مینه، انسانیت، نېکي او اخلاق حس کړي. همدا د ښه خلکو ځانګړنه ده.
