وايي چې بېړۍ ډوبه شوه. له يوه کسه پرته نور ټول مسافر اوبو لاهو کړل. دغه کس هم هسې د تصادف له مخې په يوه داسې تخته باندې سپور پاتې شو، چې تېز باد یوه ټاپو ته ورسوله. په ټاپو کې بل بنیادم نه و.
ده په ډېرو خواريو ځان ته جونګړه جوړه کړه او بیا په وحشي مېوو يا داسې بل څه پسې ووت، چې ويې خوري، څو ماښام مهال چې راستنېده، جونگړه يې وليده چې اور ورباندې بل دی. تندي ته يې ټک ورکړ او نصيب يې نامرده (بد) وباله او همداسې پسې خوب یووړ. سهار وختي يې څه څرپی وآورید، وارخطا راویښ شو، که ګوري د ساحل په غاړه يوه بېړۍ ولاړه ده او بېړۍ وان ورنه راکوز شوی، د ده په خوا راروان دی. بیړۍ وان ورته وویل: موږ دې د بل کړي اور په معنا پوه شو چې مرسته غواړې.
د حکايت درسونه
• انسان پخپل خیر او شر نه پوهېږي، کله ناکله تاسو فکر کوئ چې فلانی کار به تاسو لپاره ډېر ښه وي؛ خو هغه بد شي. کله ناکله بیا بد اټکل کوو؛ خو ښه نتيجه وینو.
• دا ومنئ، چې خدای تاسو لپاره تر ټولو غوره پلان لري.
• د ستونزو پر وخت د چغو او فریاد پر ځای خدای ته رجوع وکړئ. هغه ذات کولای شي همدا ستونزه په یو فرصت بدله کړي او ستاسو په ژوند کې مثبت تغییر راولي.
• له حکایت څخه بل درس دا اخيستلای شو، چې ژر اټکل/پرېکړه مکوئ. منتظر شئ او پایلې ته په کتو پرېکړه وکړئ.
