جرأت (له تیارو نه رڼا)

جرأت هغه ځواک دی چې انسان له وېرې او  د شکونو له تیارو یې وباسي او د رڼا پر لور یې بیایي. هر انسان په خپل ژوند کې داسې شیبې لري چې زړه یې له وېرې، شک او اندېښنو ډک وي؛ داسې شېبې چې انسان له ځانه پوښتي: ایا زه کولی شم؟ ایا زه به بریالی شم؟ ایا د دې ګام اخیستلو توان لرم؟

 خو همدا هغه شېبه ده چې جرأت خپل اصلي معنا پیدا کوي. جرأت دا نه دی چې انسان هېڅکله ونه وېرېږي؛ بلکې جرأت دا دی چې له وېرې سره سره یو ګام مخکې واخلي. کله چې انسان د وېرې پر ځای زړورتیا انتخاب کړي، نو د ژوند په مسیر کې یې بدلون پیلېږي.

    دا کتاب د همدې بدلون لپاره لیکل شوی دی. په دې کتاب کې به د جرأت رازونه، لارې چارې او عملي تجربې درسره شریکې شي. دا یوازې د نظریاتو یوه ټولګه نه ده؛ بلکې د ژوند له واقعیتونو، عملي تمرینونو او الهام‌ بخښوونکو بېلګو څخه جوړه شوې هڅه ده، څو تاسې وکولای شئ جرأت یوازې ونه ولولئ ، بلکې په خپل ژوند کې یې تجربه کړئ. ځکه جرأت یوازې د جګړې په میدان کې نه وي؛ جرأت د ژوند په هره برخه کې زموږ اړتیا ده.کله چې د خلکو په وړاندې خبرې کوې، جرأت ته اړتیا لرې.کله چې د ناکامۍ له وېرې سره مخ کېږې، جرأت ته اړتیا لرې.کله چې د خلکو له نیوکو او قضاوتونو سره مخامخېږې، جرأت ته اړتیا لرې.کله چې تېروتنه کوې، بدلون منې، له یوه حالت څخه بل حالت ته ځې، یا د رد کېدو وېره درسره وي؛ هلته هم جرأت ته اړتیا لرې.موږ هره ورځ له کوچنیو او لویو وېرو سره مخ کېږو. ځینې وختونه وېره زموږ غږ غلی کوي، ځینې وختونه مو ګامونه دروي، او کله ناکله مو له هغو فرصتونو لرې ساتي چې ښايي زموږ ژوند بدل کړي.خو پوښتنه دا ده:ایا موږ به وېره پرېږدو چې زموږ د ژوند پرېکړې وکړي؟

نه!موږ کولی شو انتخاب وکړو.موږ کولی شو یو کوچنی ګام واخلو.موږ کولی شو د وېرې تر څنګ حرکت وکړو. او همدا کوچنی ګام، کېدای شي، زموږ د یوه لوی بدلون پیل وي.

دا کتاب به درسره مرسته وکړي چې د کوچنیو ګامونو په اخیستلو، د مثبت فکر په ساتلو او د خپل زړه د غږ په اورېدو سره، په خپل وجود کې د جرأت ځواک راویښ کړې.

لیکوال: برکت الله همکار / د ویناوالۍ او جرأت لوړونې متخصص روزونکی