( پردے حق )
هسي خو د امير عالم پلار سيد عالم حاجي صيب د شکل نه ډېر ښه انسان ښکارېدو - ټوله ورځ به په جمات کښې ناست وو مونځونه او نفلونه به ئې کول او اللّٰه ته به ئې سوال او زاري کول چي خدايه ما اوبخښے. او په ژړا به شو
يوه ورځ ترې د بر کلي فقير ګل تپوس اوکړو چي بابا تهاکثر په دعا کښې په ژړا شے چې دا ولې ؟
سيد عالم حاجي صيب ورته اووئيل چي بچيه ما د ابراھيم خان په ډيران باندي په ناحقه قسم خوړلے دے او د ھغې په بدل کښې راته د ډيران دا زمکه مېلاؤ شوې ده
فقير ګل ورته اووے چي حاجي صيب ژاړه مه ستا خبره خو ډېره اسانه ده او شکر دے چې اوس درله عقل راغے لاړ شه او د ابراهيم خان ته خپله زمکه هم واپس کړه او معافي تري هم اوغواړه . ځکه چې هغه لا ژوندے دے مسله به دې حل شي
سيد عالم حاجي صيب فقير ګل ته اووے ...
بچيه دا ته څه ګډي وډي وائې . په دې زمکه خو ما قسم خوړلې دے او د قسم نه پس مې تر دے دمه د دې ډېران نههر کال خپل د داماني زمکې ته سره هم وړې ده
اوس يې ورته څنګه واپس کړم !!!
البته په ابراهيم خان پسې به ورشم او معافي به تري اوغواړم
فقير ګل چي دا واوريده نو مسکے شو او د سيد عالم حاجي صيب نه يې د تلو رخصت واخستو.
سيد عالم حاجي صيب دفقير ګل سره د په مخه کولو نه پس نيغ د ابراهيم خان پسي د ھغوي کور ته ورغلې -د ورتلو سره يې ورته اووے چي د مرګ او ژوند هيڅ پته نه لګي ما ستا په زمکه په ناحقه قسم خوړلے دے ما معاف کړه.
ابراهيم خان ورته اووے تا ډير زياتے کړے وو په دروغه دي زما په زمکه قسم خوړلے وو وژلے مې نه شوے ځکه چي د يو انسان قتل دپوره انسانيت قتل دے. په دغه وجه مې د زمکې نه زړه صبر کړے وو.. خو د قيامت په ورځ مي زمهوار يې زه تا نه بخښم-
سيد عالم حاجي صيب چي د ابراهيم خان دا خبره واوريده نو غلے شان پاڅيدو او په زړه کښې ئې دا فيصله اوکړه چي زمکه ورته ولي واپس کړم .. بس چي زه مړ شم نو کيدې شي ابراهيم خان راته بخښانه اوکړي
سيد عالم حاجي صيب په دغه سوچونو کښې وو او لا خپل کور ته رسيدلے هم نه وو چي دجمات په لاؤډ سپيکر کښې اعلان اوشو چي ابراهيم خان وفات شو جنازه به ئې سبا سحر اته بجې د بر کلي په جنازګاه کښې ادا کيږې.
سيد عالم حاجي صيب اوس هم جومات ته ځي راځي مونځونه هم کوي او دخدائ پاک نه سوال هم کوي چي خدايه ما اوبخښے ..
خو کله کله چې په جومات کښې فقير ګل اوويني نو زر ورته د ابراهيم خان خبره راياده شې چې ما نه يې بخښلے او بيا په ژړا شي .
🌷 🌷 🌷
د کتاب پردے حق نه انتخاب
