د ژمي شپې او ورځې وې ښوونځي مو رخصت وه د کلي په بازار کې مې د ریاضي کورس شروع کړ هره ورځ به په بایسکیل کورس ته تللم راتلم.
بایسکیل به مې د کورس مخ ته له یوې ونۍ څخه کلک په ځنځیر تړه چې څوک یې را څخه غلا نه کړي خو د احتیاط سره سره یوه ورځ چې له کورس څخه راووتم ونه ولاړه،ځنځیر پروت او بایسکیل پر ځای نه وه هک پک شوم چې دا څه راوشوه همداسې کورته راغلم.
شپه شوه له ډوډۍ خوړو وروسته غلی ناست وم ځکه چې ګلان مې کرلي او بایسکیل مې ورک کړی وه ټولو راته ویل چې هلکه څه خبره ده؟ څه شوي دي؟ چپ وم بالاخره دې ته اړه شوم چې کور کې کېسه وکړم، ټولو ته مې وویل چې نن مې بایسکیل را څخه چا غلا کړ.
ورورنو، خویندو یو بل ته سره کتل را کتل او زه به یې ځورولم چې اوس به دې پلار چاره وکړي پلار راته هیڅ غږ ونه کړ او دومره یې راته وویل سبا زه هم درسره ځم او په بازار کې به درته یو بل نوی بایسکیل واخلم.
سبا زه او پلار دواړه لاړو بازار ته پلار راته یو بل نوی بایسکیل واخیسته له بایسکیل اخېستو یو ورځ وروسته کورس ته ولاړم چې دا غله زه تعقیب کړی وم کله مې چې بایسکیل صنف مخ ته درولې وه بیا یې را څخه وړی وه او چې له صنف څخه راووتم بیا بایسکیل پر خپل ځای نشته دی.
اوس نور هیڅ چاره نه وه را پاتې په سترګو مې توره تیاره شوه چې هلکه یو خو دې ورک کړ پلار درته بل واخیسته اوس به څه کوي څو ځایه مې پوښتنه وکړه تر ماښامه هیڅ هم د بایسیکل څرک ونه لګېده ماښام ماښام کورته ولاړم دا ځل نو له وېرې بیخې کوټې ته هم نه ننوزم او ځان سره مې وویل چې نن شپه به ډوډۍ هم نه خورم.
بلاخره بیا مجبور شوم چې خپلې کورنۍ ته ټوله کیسه وکړم او دا مې کور کې وویل چې نن بیا را څخه بایسکیل ورک شو.
دا وخت مې پلار په لوړ غږ وخندل راته یې وویل چې زویه ښه د وکړل تا دوه ورک کړ خو زه چې کله ځوان وم ما درې بایسکیلونه پرله پسې ورک کړ سبا به درته یو بل واخلم غم یې مکوه دا دې هم چې ورک کړ بیا به یې په اړه بحث وکړو چې وروسته له دې څه وکړه او څه ډول تدابیر ورته ونیسه.
اوس نو له خوښۍ په جامو کې نه ځایږم سبا دواړه لاړو بازار ته درېم بایسکیل یې راته واخېسته هماغه درېم بایسکیل شو چې ښوونځي مې پرې خلاص کړ او نور چا را څخه غلا نه کړ.
له پلار څخه مې مننه چې زما او زما د خویندو د زده کړې په بهېر کې یې تل قرباني ورکړې ده.
