کله چې د خپل بدن جوړښتونو، اروایي کیفیتونو، احساساتو، غریزو، د مغز او شعور فعالیتونو، د خپل فکر او نظر حالتونو، د چاپېریال او طبعیت سره د بېلا بېلو اړیکو، او د خپل وجود داخلي، خارجي، مادي او معنوي غوښتنو، اړتیاؤ، احتیاجاتو او نورو ځواکونو او خاصیتونو ته ځیر شې، نو درته په ډاګه به شي چې زه ډېر څه لرم، او ډېر څه پر ما پورې اړه لري او د دې ټولو مسؤل یوازې او یوازې زه یم..............
نو په دې اساس په ځان پېژندنه کې باید له ژورتیا، دقت، فکر څخه کار واخلې، خپلې خبرې د کنټرول کړه، او خپلو ټولو اعمالو ته د لوی فکرۍ په سترګه وګوره.
د ځان حقیقي بعدونه د وارزوه، اوس ددې وخت ندی، چې ته څومره پهلوان یې او څومره خلک ډبولی شې، بلکې ددې وخت دی، چې ستا فکر څومره کار کولی شي او تر نورو څو چنده فکر کولی شئ او لوی پلان طرحه کولی شئ؟
ځان وپېژنه! یعنې د خپل ځان نه لاندې پوشتنې وکړه د خپل ځان په پېژندلو کې.
۱_ زه څوک یم؟
۲_ زه په څه سبب دې نړۍ ته راغلی/ راغلې یم؟
۳_ ددې ژوند څخه زما ګټه څه ده؟
۴_ زما د وجود حقیقت او مسؤلیت څه دی؟
۵_ پس له دې ژوند نه به زه چېرته ځم؟
که څوک واقعاً سم او منطقي ځواب دې پوشتنو ته ورکړي، او هغه په ځان عملي کړي، نو نه به په دې دنیا او نه به په هغې دنیا خوار شي.
ځان وپېژنه! یعنې، خدای 'ج' ماته ژوند رابښلی او ژوند هم دروند پور دی، چې باید ادا یې کړی شم، د څه شي لارښونه چې یې راته کړې هغه باید پرځای کړم، او د څه نه یې چې منع کړی/کړې یم د هغې نه پرهېز وکړم.
ځان وپېژنه! یعنې، ځان جوړونه هغه څه ده چې د انسان واقعي څېره رابرسېره کوي. د خپل عقل، فکر، نوښت، انګېزې، خلاقیت، بدن، صبر، رښتینولۍ او صداقت، وجدان، استقامت څخه د خپل ځان په پېژندلو کې سمه ګټه پورته کړه او د الله 'ج' نه شکر ادا کړه.
ځان وپېژنه! یعنې د کوم کار او کوم شي سره ډېره علاقه لرم؟ کوم مسلک او کوم کسب مې ډېر خوښېږي؟ په خوراک کې راباندې کوم خواړه بد تاثیر لري، روغتیا او پاکي مې څه ډول ده او څنګه یې ورځ تر بلې د ښه توب خواته بېولی شم....
ځان وپېژنه! یعنې خوځښت، کار او هلې ځلې مې د ژوند بنسټ دي.
ځان وپېژنه! یعنې زه یو ټولنیز موجود یم، باید په ټولنه کې ویاړلی واوسم، د ټولنې ګټې په خپلو شخصي ګټو قرباني نه کړم.
ځان وپېژنه! یعنې باید دبدیو څخه ډډه وکړم، او د منفي ذهنیتونو د تاثیر لاندې رانشم، بلکې نور د خپلو نېکو اعمالو په تاثیر کې راولم.
ځان وپېژنه! یعنې، زه باید تل د خپل عقل د فرمان لاندې ژوند وکړم.
ځان وپېژنه! یعنې، زه باید پوهه لاسته راوړم او په هر شي کې معقول فکر وکړم.
ځان وپېژنه! یعنې، خپلې اړتیاوې، غوښتنې او حاجتونه تر نورو په ښه ډول پوره کړم.
ځان وپېژنه! یعنې، د زمانې له غوښتنو سره سم خپلې غوښتنې عیار او آشنا کړم. البته د اسلام په ړنا کې.
ځان وپېژنه! یعنې، زما د نن ورځې سلوک راته د سبا ورځې جنت او دوزخ جوړوي.
ځان وپېژنه! یعنې، زه مې ځان ته په نېکیو تغیر ورکوم.
ځان وپېژنه! یعنې زه باید د ستونزو او خنډونو سره وجنګېږم او پرې بری ومومم.
ځان وپېژنه! یعنې، زه باید د چاپلوسۍ او احترام ترمنځ توپیر وکړم.
ځان وپېژنه! یعنې، زه بابد دومره ساده نه شم چې نور راته دوکه راکړي.
ځان وپېژنه! یعنې! له هغه څه نه چې زما په طبعت، ځان او وجدان کې ژور خپګان او کمزوري راولي باید ډډه وکړم.
ځان وپېژنه! یعنې، زما ټوله نېکمرغي او بدمرغي، زما په خپل وجود کې ده.
ځان وپېژنه! یعنې، د نورو په عزت کې باید خپل عزت پیدا کړم.
ځان وپېژنه! یعنې، زما باورونه، ذهنیتونه او اندېښنې زما ژوند ته لوری ورکوي، نو ځکه زه باید ټول سوچه وساتم.
مأخذ: لطفاً مه ساده کېږه
لیکونکی: محب الله رسولي
