ژباړه ـ رياض مقامزی
مختلفې ناروغۍ د انسان ژوند او روغتيا ګواښي. ددې ناروغيو د څرګندېدو او پېژندو لپاره ځينې علایم موجود وي. که دقیق ځیر شو، د لاسونو په شمول زموږ د بدن په بېلابېلو برخو کې د ناروغيو علایم ښکاري. که تاسو د لاسونو د رپېدو ستونزه لرئ، نو ددې ناروغیو د شتون امکان شته.
لومړی| مغزي سکته (فلج)
دا حالت هغه وخت رامنځته کېږي، چې په وینه کې ټينګوالی پیدا شي او مغزو ته د وینې د رسېدو مخه ډب کړي. په داسې حالت کې ستاسو لاسونه رپېږي او د یو جدي ګواښ خبر درکوي.
دویم| مولټیپل اسکلروزیس (MS)
دا هم یو ډول عصبي ناروغي ده، چې ناروغ یې د نورو علايمو ترڅنګ د بدن/لاسونو رپېدل هم تجربه کوي. په دې ناروغۍ د عصبي سیسټم یوه برخه زيانمنه شوې وي او پدې توګه د کنټرول په برخه کې ستونزې رامنځته کېږي.
درېيم| پارکینسون
پر دې ناروغۍ اخته کسان هم د بدن او لاسونو رپېدل احساسوي. په ډېريو حالاتو کې لړزه له یوې خوا پیلېږي او بلې خوا ته پای مومي. باید ووایو، چې په دې ناروغۍ کې د احساساتي کېدو او فشار په وخت کې د لاسونو رپېدل خورا چټک کېږي. نو که تاسو هم دا ستونزه لرئ، باید له ډاکټر سره ووينئ.
له دې سره ـ سره په ځينو حالاتو کې د الکولو ډېر څښل، مسموميت، د بډوډو ستونزې، وېره او فشار هم کولای شي ستاسو د لاسونو د رپېدو سبب شي. همدارنګه ځينې طبي درمل هم یاده ستونزه رامنځته کولای شي.
څه وکړو؟
که تاسو هم د لاسونو د رپېدو ستونزه لرئ، عادي یې مه بولئ. هڅه وکړئ، چې له یوه پوه او متخصص روغتیاپال سره ووينئ ترڅو د ناروغۍ له تشخیص سره مو په درملنې هم پیل وکړي.
