لیکنه ـ ریاض مقامزی
وايي له دویمې نړېوالې جګړې وروسته، له یو لوړپوړي جاپاني چارواکي وپوښتل شول: "یواځې ستاسو هېواد و، چې امریکا پرې اټومي حمله وکړه. نو ویلای شو، تاسو د امریکا سرسخته دښمنان یئ؛ مګر ولې له تاسو د "مرګ پر امریکا" شعار نه اورو؟"
ځواب یې ورکړ: "شعارونه د هغو خلکو کار وي، چې په عمل کې هېڅ نه شي کولای. همدا چې د امریکا د ولسمشر پر مېز زموږ پاناسونیک ټلیفون ايښودل شوی؛ نو موږ ګټونکي یو."
د حکایت درسونه
- که غواړئ بريالي شئ، د خبرو پر ځای عمل/کار ډېر کړئ.
- شکسپیر وايي: "بې کماله سړی لکه تش لوښی ډېر شورماشور کوي." آیا غواړئ تش لوښي اوسئ؟
- له هرې ناکامۍ زدکړه وکړئ او دښمن ته د ګواښ پر ځای پخپل ځان خواري وکړئ.
- دا غوره انتقام دی، چې د وخت په تېرېدو له خپل رقيب څخه په اخلاقو، علميت او نورو ښو کړنو کې برتري ولرئ.
- د خبرو پر ځای د عمل خلک شئ.
- خبرې، لافې او د بریا تمثیل کاذبه خوښي درکوي؛ خو عمل او کار مو د خبرو برعکس واقعي بریا ته رسوي.
- انتخاب ستاسو په لاس کې دی. تشې خبرې کوئ، ځانته کاذبه خوښي ورکوئ او ناکامېږئ؟ یا غواړئ عملا د خپلو هیلو لپاره کار کوئ او د بریا خوند څکئ.
