د همت الله امین زي ژوند او شاعري

مخکينۍ خبرې 

د لوی او سپيڅلي څښتن تعالی څخه شکر ګذاره یم چې ماته یې دا توفیق را په برخه کړ چې وروسته له یوی تحصیلي دورې په یوه اړینه او ښکلې موضوع باندې علمي څیړینه وکړم.

د پښتو ادب په خپله غېږه کې بېلابېل تاند ځوانان رانغښتې دي، چې د پښتو ادب په زرغونتيا کې يې خپله خپله ونډه اخيستې ده او پښتو ادب يې په اوسمهال کې تر پخوا ډېر زرغون کړی دی او انشاالله نور به يې هم زرغون کړي. 

د دوی  افکار موږ ته د روښانه مثالونو حيثیت لرې چې د هغو په پلوشو کې موږ کولاې شو د خپلې ټولنې ځانګړنې او مشخصات وپيژنو په بله وينا دغه مثالونه  له موږ سره ملي هویت او سپيڅلو عنعناتو په درک او ساتلو کې مرسته کوي.

زما مونوګراف د امین زي ژوند او شاعرئ ته ځانګری شوی دی. د امین زي په شاعرۍ کې د نورو موضوعاګانو په پرتله پښتو او پښتنو لپاره د پيغام تله ډيره درنه ده، او پيغام يې د شعر په  ژبه  خپلو هیوادوالو ته  او د خلکو غوږونو ته په پوره احساس رسولی دی، له دې سره سره ما هڅه وکړه، چې د امین زي د ژوند، د اثارو او اشعارو په  اړه څه نا څه معلومات را ټول او د مینه والو مخ ته کېږدم. 

په  ځای یې بولم چې د ژبو او ادبیاتو پوهنځۍ د پښتو څانګې له ټولو استادانو څخه د زړه  له کومې مننه وکړم، چې له ما سره یې د تحصیلي دورې په موده کې نه سټري کیدونکي هلې ځلې او هر اړخيزې مرستې کړيدی، او په خپل وار سره له لارښود استاد محمد اقا (شیرزاد) نه د زړه له  تله مننه کوم، چې د دې لیکنې په بهیر کې راته اړینې لارښونې او هر اړخیزه مرستې نه دي سپمولي.

په پای کې خپلو استادانو ته د لوی خدای(ج) له درباره د هوسا او خوشاله ژوند غوښتنه کوم، هیله لرم په راتلونکې کې هم ادبي موضوعاتو او څیړنیزو چارو کې خپلې نیکې لارښوونې راباندې ولوروي.

درنښت

عادله