د تعلیمي نصاب ستندردونه

د یوې ټولنې پراختیا کاملاً د هغې ټولنې په کادرونو، کاري قوې او بشري ځواک پورې تړلې ده، همدا بشري ځواک په هر زمان او مکان کې د خپل چاپیریال د پراختیا مسوولیت لري، چې تل د خدای ج له لوري او د انساني فطرت له پلوه مکلف دی، تر څو د ځمکې په ښه ودانولو او د خلکو د ژوندانه په پراختیا کې خپل رسالت او فعال رول ادا کړي. نو د هر انسان رسالت د خپلې ټولنې، خلکو او ټولنیز نظام پر وړاندې ډیر لوی دی او په هيڅ وخت کې د ماتېدو او دریدو نه دی.

د پوهنې نظام په ټوله کې او په خاص ډول په تخنیکي او مسلکي زده کړو کې مسولیت لري، تر څو د افغانستان پراختیايي اهدافو ته د رسیدو لپاره، خصوصاً د حرفوي او مسلکې کادرونو په روزنه او د تخصصي ظرفیتونو په جوړولو کې خپله بشپړه دنده تر سره کړي. همدا رنګه ځوانانو او زلمیانو ته د کار بازار په وده او پراختیا کې ورته په سیستماتیک ډول ونډه ورکړله شي.

دا چې په افغانستان کې ټولنیز نظام او د ژوندانه طرز د اسلام سپیڅلي دین د احکامو او د انساني مشروعو قوانینو په رڼا کې پر مخ ځي، نو د ځوانانو سالمه روزنه او په دیني، وطن دوستي او قانونولي روحیه باندې د هغوی سمبالونه، نه یوازې اسلامي او ملي وجیبه ده، بلکې د ټولنې مادي او معنوي وده او پرختیا هم تضمینوي. چې له دې سره افغانستان له وروسته پاتي والي، اقتصادي کمزورۍ او سیاسي، اجتماعي او اقتصادي احتیاجونو نه ژغورلی شي او یوه روښانه راتلونکې راته ټاکلی شي.

نو لازمه ده، چې ښاغلي استادان، مربیان، اداري مسوولان، شاګردان او محصلان دا درک کړي، چې د هیواد روښانه راتلونکې د هغوی په توانمنو لاسو پورې تړلې ده. زموږ د ځوانانو تخنیکي او مسلکي زده کړې، مهارتونه او حرفوي توانمنۍ کولی شي، په زیاتو برخو کې خپل افغانستان پر پښو ودروي.

کاري ځواک په هر تشکیلاتي سیستم کې د انساني ځواک د صلاحیت تابع دی، د اکاډمیکو زدوه کړو او تجربو سربېره د انساني ځواک حرفوي صلاحیت هم د هغو پروسو د ستندرد جوړونې په ولکه کې دی، چې تشکیلات پکې شتون لري. دا ستندردونه چې د نظري مباني شاخصونو، چاپېریالي شرایطو او داخلي او خارجي تجربو سره چمتو کیږي، د هر مدیر لپاره د بیا کتنې او څارنې امکان برابروي. همدې ته په پام سره اړ شوو، چې په تعلیمي نصاب کې په روانو اخلاقو او کړنلارو باندې بیا کتنه وکړو او یاد شاخصونه په نوي  او وړ چوکاټ  کې په کار واچوو.

په درنښت

امین زی