د بشري تاریخ سل اغېزمن کسان ( The 100 )

دا څېړنه د امریکايي لیکوال مایکل هارټ د «The 100: A Ranking of the Most Influential Persons in History» کتاب علمي معرفي، تحلیل او نقد وړاندې کوي. په څېړنه کې د لیکوال ژوند، د کتاب د لیکلو هدف، د شخصیتونو د انتخاب معیارونه، د حضرت محمد ﷺ د لومړي مقام علتونه، د انیس منصور عربي ژباړه، د ژباړې علمي ارزونه او د کتاب مهمې نیوکې او ستاینې بیان شوې دي. 

څېړنه څرګندوي چې مایکل هارټ د تاریخي اغېز پر بنسټ شخصیتونه درجه بندي کړي او حضرت محمد ﷺ یې د دیني او سیاسي دواړو ډګرونو د بې سارې اغېزې له امله په لومړي مقام کې ځای کړي دي. همدارنګه څرګنده شوې چې د عربي ژباړې په ځینو برخو کې د اصلي متن له مفهوم څخه انحرافونه موجود دي چې د علمي نقد وړ دي. 

په پایله کې دا څېړنه دې نتیجې ته رسېږي چې که څه هم د شخصیتونو درجه بندي یوه نسبي موضوع ده، خو د مایکل هارټ کتاب د تاریخي مطالعاتو له مهمو معاصرو آثارو څخه شمېرل کېږي او د هغه علمي مطالعه د تاریخ، تمدن او اسلامي شخصیتونو د نړیوال اغېز د ښه درک لپاره ځانګړی ارزښت لري.